بواسطة : .
12:50 م - 2024/10/14 - 604 views
ليل وسما زحمة مجرات ونجوم
متفرقه ياذيب تشبه شتاتي
ماحولي الا جرهدن قفر وحزوم
وانا وروحي والمشاعر وذاتي
سهران اجيب علوم واودي علوم
وافك رمز علومي المبهماتي
كنت ابذل المجهود واطيح واقوم
الين طحت بوسط رحلة حياتي
يافاتن الماضي مقدر ومقسوم
والمقبلات مقدره قبل تاتي
مامات من فقد الملذات محروم
ولاماتت احلامي ولا ذكرياتي
صحيح صدري من طواريه مزحوم
يشكي على صمتي بطا سولفاتي
ياكثر ماغنيت في راس مزموم
من شان احقق رغبتي وامنياتي
بعد انهزم قدامي الفرس والروم
قل للعرب تقرا زعل مفرداتي
على الورق بوحي تصاوير ورسوم
صوت القلم يفضح ملامح صفاتي
ياليت لي ريش وجناحين واحوم
الارض ضاقت غير موضع صلاتي
عيدعاتق الحربي
صبح وعصر وبروق ورعودوغيوم
على السهل وجباله النا يفاتي
تشرح ضمير اللي من الهم ملزوم
يسهر بليله ما يجيه المباتي
ويسعد بعد ماكان بالحيل مهموم
وينام متوسد بكم العباتي
خالي من الهوجاس والشك واللوم
في ديرة فيها يطيب المباتي
زانت مرابعها بفلٍ ويشموم
وأديمها مخضر زهر ونباتي
لا باس ياصدر من الود مكلوم
تسلم من اللي فات والباقياتي
مالك ومال اللي يقزي من النوم
ويعيَّشك بين الأمل والشماتي
دامك هزمت الروم والفرس شغموم
حتى ايش لو تتعب على العادياتي
ارتاح من بعد العنا وانت مخدوم
هزمت الاعدا يا الكريم الزناتي
متوسط مابين شيخان وقروم
أهل الوفي والطيب والمكرمات
لو ان رمح ذياب بالموت مسموم
تجنبه يا عيد في المقبلات
واحذر من اللي يتقن السبح والعوم
في بحر كله زيف ومغالطاتي
أبو مفلح/ حامد جابر السلمي
جدة في ٥/ ٤/ ١٤٤٥ هـ
أعجبنى
(3)لم يعجبنى
(0)
تحت رعاية سمو ولي العهد.. انطلاق أعمال مؤتمر مبادرة القدرات البشرية في نسخته الثانية بالرياض
